Sopr'acqua e sopra vento
Andiamo a Benevento;
Balliam con le Comari
Ne' lor sacrati lari.

Tultu mie l'urzulu e li dinari, nni jvi de buene gambe, e rriai a tiempu. A lu turnu, comu fui a lu largu, vitti vinire de sutta la turre de ll’ureggiu, vicinu a mie, unu omu, ca a la voce ricunnobbìi ca era Zìu Gilletto; ca a lu vistire mme sarebbe parsu mpossibbele. Curiusu propriu a llu vederlu! Tinia ndrussata na giubba de beddhu verde, carzuni russi affibbbiati a lle recchie de li jinnocchi, supra carze bianchissime de seta, scarpe lustre, cravatta e curpettu biancu, e berretta de vellutu russu cu lli galluni d’oru; tenea intra li mani nu bastuncinu leggiadru, cu llu pumu de perla, a lucida ghiera. Avea la zzazzera ben pettinata, guanti gialli a lle mani, e oleva tuttu de zibettu.
– Bbuona sera, beddha piccinna – mme disse iddhu, garbatu e amurevule – unni curri accussì de sutta?
– A purtare lu vinu pe la cena – lle rispusi ieu – ca lu tata vo’ durmire. E vui, comu mai cusì rassetu e attillatu, ca mme pariti propriu nu spusu?
– Nu lu ssai? – aggiunse iddhu – staju scennu a ggodere na festa cca vicinu. Oh! li beddhi doci e liquori squasiti, e li beddhi surbetti, e ogni sorta de delicatu mangiare, ca nni sarà a bizzzeffe! Voi vinire cu mie, piccinna? Nnu’ tornamu prestu.
– Ma ieu staju cusì mal conza ca è na pietà – lle rispusi – tengu nn’addossu na gunnella de casa, e sugnu scalza pe’ giunta.
E iddhu:
– Quiddhu è nente; vene cu mie, ca quannu simu culà, tte fazzu fare netta, e tte fazzu addurnare comu na regina, de seta, veli e culane date de le mie cumari. Vide’ cose bellissime e nove.
– Sciamu – dissi ieu, allisciata de lu so’ parlare.
Tultumi iddhu allura de manu l’urzulu, llu pusau a nn’angulu de la piazzetta, unni cc’era ll’umbra. Mossetusi subbitu de culà, ieu llu segguìi; e comu fummu sutta lu muru de lu jardinu de li frati, ssi firmau, e cu llu bastune facìu nu cerchiu ’nterra: mbrugghiunati nu sacciu quali paroli, nnu’ vedimu a nnanzi a nui nu paparu, tantu granni ca ieu, intra la vita mia, no’ nn’haiu mai vistu l’uguale. Zìu Gilletto se nne sagghìu subbitu a cavallu, e mme ’nvitau a pusìrimi ’n groppa. Comu vide’ ca ieu m’era appuiata:
– Tienti forte a la coda de la giubba mia – mme disse – e stai ferma; e bada de no’ scittare nente ca sia de sacru, ca sinnò nni perdimu tutt’e ddhòi; picchì cu nnu sulu saltu la bestia se scarica de lu pesu nostru.
Nu’ ancora iddhu aveva scittatu l’urtima parola, ca l’uceddone, spalancate le ali, se nne sagghìu da ’nterra, e pigghiau subbitu nu volu tantu altu; tantu ca a mie mme parìa de toccare quasi cu la manu la luna, le stelle, e finu la volta de lu cielu.
Abbassandu pe’ pocu li uocchi, vitti giù, sott’a li pedi miei, città, boschi, villaggi, mari, muntagni; e mme parìanu diventati piccinni e comu pittati nn’i quadri.
A nu puntu unni c’era na gran valle, sentii fischiare la timpesta, e romureggiare l’uraganu; e vitti lu guizzare de li lampi, a cui succedeva lu rumpu de lu tuonu, ca s’udia, comu purtatu de li venti, luntanu luntanu. Allura ieu, chiusi li palpebre, tremava tutta, presa da na paura tremenda; e malidiceva ’n core mie l’ura e lu mumentu ca m’era capitatu cu quiddhu dimonio de viecchiu. Allura vitti chiaru ca eranu vere le accuse ca li davanu, de star iddhu misculatu nn’i fattucchierie; e bbene meritate le longhe penitenze, ca lu nostru arcivescuvu, bona anima, lu faceva spissu fare. E quasi chiangennu, lle scittai:
– Unni mme cunduciti vui stasera? Deh, piaciti mme pusare ’nterra; ieu tremu tutta de lu spaventu, ca mme parìa vicina tantu la morte.
– Taci, scema – mme rispusi Gilletto – ca or ora arrivamu.
Poi, stizzannu na so’ arietta, cantarellava:

   Sopr’acqua e sopr’u ventu
  Sciamu a Beneventu;
  Ballamu cu le Cumari
  Ne’ li lor sacrati lari.

Confortata nnu pocu intra de mie, pensannu a li ggodimenti ca mi eranu promessi, apersi pe’ pocu li uocchi, volgennu giù lu sguardu; e mme parìa de vidire, intra na campagna larga, comu de focu risplendenti fra li arberi de nu boscu, intra li quali apparìa na luce cchiù grande e cchiù lucente. Lu valenti ucceddhu, mentri tantu, senza sciddicare lu volu, se nne jia de manu nn’ manu abbassandu versu la terra, finu a quannu arrivau nn’un giardinu beddhu assai, chinu de piante ffavuruse fiorite, e de arberi cu beddhi frutti maturi, ssi firmau appiju de na fontana de marmu biancu, cu tanti schizzetti e cascatieddi, chiare e beddhissime a vidire. Scesimu ambo a terra, lu paparu se nne ntrasette a nuotu nn’a vasca; e nui, misciuti nn’un viale profumatu pe tanti fiori variopinti, doppu quarchi passu fummu davanti a nu palazzu beddhissimu e maravigghiusu, tuttu de cristallu, bbene luminatu a ogni so’ parte: e era tantu lu splendore ca, appena, a riguardarlu, potea reggere l’uocchi.
Dui gentili donnelle, nobilmente vistute, mme venieru nnanz’a mie, anzi mme le vitti d’improvvisu davanti, senza aviri sintutu romure de li pedi soi, ca eranu tantu leggiereddi ca pareva non appujassero a terra. E:
– Siate la benvenuta, bella piccinna – mme disseru; e pighjannume pe’ la manu, mme cunduseru cu iddhe intra na stanza terrena, unni, spugghiata da capu a pedi, mme dettero prima nu bagnu friddu e profumatu, ca mme fece sentire tutta confortata e rifatta; e poi mme arricciarunu li capiddi e li unsero cu oliu tantu soavissi, ca profumavanu de rosa e bergamottu.
Dopu, aperto nu armariu, ne trasseru na veste de drappu cu ricami, ca pareva fatta su misura pe mie; e calzi e magnifici usattini; e tuttu mme posaru cu bel garbu e cu la cchiù grande prestezza. Tolseru puru na collana, tutta de perle finissime legate ad oro, e mme la missiru ’nto collo; e li trecci mme furunu ornate de ffiori gentili e lucenti brillanti.
Accussì adorna com’era e fatta bbona bbona, ca pareva propriu na regina, mme riconduseru nn’u giardinu, dicennu:
– Divirtiti a tuo piacere – e se nne ieru.
Vennemi subbitu dappressu nu gentil cavaddhieri a offrirmi lu bracciu; e accussì nzime ntrammu nn’i viali, rischiarati da mille lampi de cristallu nitidissimu, a cogghjere ffiori e nornarcene, e pomi sapurusi da l’arberi; e a ci sollazzare nn’i giuochi piacevuli, nzime cu autri dame e cavaddhieri, ca trasivanu puru ddà in folla.
Assittati poi intra li piante, chi novellava, chi cantannu, e chi intrecciava allegre carole. Là mme capitau de ncontrare tanti pirsuni, ca ben ricunnosceva, tra li quali nu sindacu de Francavilla, ca sapea, comu dicìasi da molti, la virtù de fare l’oru; nu molto reverendu de Maruggio, ca non sacciu in qua’ pegole, cu l’iscompigghiu de li soi frati; e nu canonico du duomu de Oria, cu na monaca, pe iddha delirava e la vasava; e a sta ultima rivolta vuliva lu magagnatu pe forza sposarla.
Vitti accussì tutti chiddi nn’u giardinu de li fate; e tutti vistuti, senza distinzione, pomposamenti e in leggire fogge, si baloccavanu a mille maneri. Ziu Gillettu aveva puru iddu la so’ dama a bracciu, forse la cchiù bbona e ffavurusa fimmina ca mme capitau de vidire ddà.
A nu tratto se sintiru sunati melodiosi de arpi, de flauti, de viole e de autri strumenti piacevuli de fiatu e de corda; ca facian capiri a tutta la brigata ca già s’avviava lu ballu.
A l’avvisu, tutti quanti eranu, dame e cavaddhieri, se suseru e se nni jeru nn’u palazzu; e iu cu iddhri. E, saliti li scale, ca eranu de finu alabastru, ntrammu nn’una vasta e magnifica sala, de specchi, e preziusi arrazzi cu frange d’oru, e ffiori a festuni, maravigliosamenti nornata, e splendenti pe’ tanti doppieri e lumere. Datu lu cuminciamentu, iu fui graziosamenti invitata du me’ cavaddhieri a nu giru de ballu, ca feci cu tanta abilità e sveltezza, comu se ne fossi stata già longa tempu istrutta. Intrai poi nn’i quadrigli e n’autri balli, ca succedevanu cu ordine e leggirezza; dopu li quali se feceru li giuochi de fimmini assai ffavurusi cu giuvini ben disposti e gentili: e fu nu dilette e divertimentu generale, ca mai cchiù fu vidutu.